Thursday 16th May 2024
जनताको दुःख देखेर आफैँ भावुक हुन्थे क्याप्टेन रोशन
श्रीराम सिग्देल
पश्चिम र मध्यपश्चिमका हिमाली जिल्लाहरुको सुरक्षित हवाइ यात्राका लागि सबैभन्दा विश्वाशिला र भरपर्दा क्याप्टेन थिए रोशन मानन्धर ।
रोशन मानन्धर मेरो दिल दिमागमा कहिले पनि नमेटिन सुन्दर छाप सहितको साथीको रुपमा रहिरहने छन् ।
म मात्र होइन मजस्ता धेरै साथीको त के कुरा कहिले नचिनेका, नभेटेका र नदेखेका मान्छेहरु पनि त्यो पाइलट को थियो होला जसले मलाई दुःखको बेला यति धेरै सहयोग गर्यो भनेर, नाम थाहा नपाए पनि उनलाई अझैसम्म सम्झिरहेका छन् ।
यो कुरा पढ्दा उनीहरुलाई थाहा होला कि उनी त्यही पाइलट थिए जसले सिट नपाएर अप्ठेरो परेको बेला म्यानेजमेन्ट र प्रशासनका मान्छेहरुसँग कुरा गरेर चिन्दै नचिनेका मान्छेहरुका लागि यात्रा गराइदिन्थे ।
हो, उनी एकदमै अलपत्र परेका मान्छेहरु देखेर भावुक बन्थे र आफैँ सोधी खोजी गरेर दुःख पाएका मान्छेहरुका लागि आफैँ व्यवस्था जुटाइदिन्थे ।
उनीसँग म साथीको नाताले मात्र होइन, व्यवसायिक कामको सिलसिलामा पनि धेरै पटक धेरै हिमाली हवाइ यात्रामा सँगै समय बिताएको छु ।
अरुले पनि सुरक्षित यात्राका लागि रोशनलाई नै खोज्थे भने म त झन दाइजस्तो पनि साथीजस्तो पनि एकदमै मिल्ने भएकोले उहाँको क्याप्टेसिप भएको फ्लाइट नै नरोज्ने कुरै भएन ।
उहाँ विमान चलाउँदा साथी भाइ, दाजु केही हुनुुहुन्नथ्यो केवल उहाँ एक कुशल पाइटल हुनुहुन्थ्यो । हवाइ यात्राको क्रममा उहाँ अनौपचारिक कुराहरु खासै गर्नु हुन्नथ्यो तर पनि कुनै अवस्था यात्रुहरु डराएजस्तो लागेमा आफ्ना सहयोगी मार्फत ढाढसका सन्देश पठाउनु हुन्थ्यो ।
त्यसैगरी उहाँ यात्रा सकिएपछि पनि आफैँ धेरै यात्रुहरुलाई भेट्नु हुन्थ्यो ।
हामी प्रायसः नै शनिबार वा विदाको दिन उहाँसँगसँगै बस्ने गथ्यौं । धेरै समय सँगै बिताएका छौं ।
तर, अब यी सारा समय कस्तो एक्लो एक्लोजस्तो लागिरहेको छ ।
जनताको दुःख बुझने एक कुशल क्याप्टेनलाई के आइपर्यो त्यस्तो र उनको धैर्य, विश्वास, सारा कुराले काम गरेन कुन्नी
म उहाँको आत्माको चिर शान्तिको कामना गर्दै शोक सन्तप्त परिवार प्रति हार्दिक समवेदना व्यक्त गर्दछु ।