नयाँ नेपालका नयाँ मौसूफहरु !

श्री १० राष्ट्रपति र प्रधानमन्त्रीको धुलिखेल सवारी 

©बलराम प्यासी

सीमित व्यक्तिको स्वार्थका कारण हजारौं जनताले दुःख पाउनु नै गणतन्त्रको मूल उपलब्धि रहेछ । जनतासामू धक फुकाएर यीनीहरु कहिले हिँड्न सक्लान ? अनि नयाँ मौसूफहरुको सवारीमा जनताले दुख नपाउने दिन कहिले आउला ?

गत शुक्रबार कामको सिलसिलामा अनामनगर हनुमानस्थान हुँदै बानेश्वरतिर जाने मुल सडकमा थिएँ ।

नयाँबानेश्वरतिर अघि बढ्दै गर्दा सडकको विचमा रहेको आइल्याण्डमा हरेक २० मिटरको दुरीमा प्रहरीहरु उभिएको देखेँ ।
सार्क सम्मेलनताका रोपेको विरुवाको हाँगा वटुवाले भाँच्लान् भनेर रेखदेख गर्न ड्युटीमा बसेको ठानँे । मिनभवन, तीनकुने हुँदै कोटेश्वरतिर जाँदा त झन् मुलसडकभरि नै प्रहरीहरु झपक्कै देखेँ ।

बागमती र मनोहरा पुलमुनी त शसस्त्र प्रहरी टन्नै बसेका रहेछन् । आतंककारीले पुल उडाईदेलान् भनेर रहेछ ।
मध्यान्ह १२ बजेको हाराहारी हुँदो हो, घडी हेर्न भ्याएको थिइनँ । नयाँबानेश्वर, मिनभवन, तीनकुने, कोटेश्वर, जडिबुटी, लौहकिल्थली, कौशलटार, गठ्ठाघर, ठिमी लगायतका बसविसौनी पुरै खाली गरिएको थियो ।

यात्रुहरु बसको प्रतिक्षामा लामो समयदेखि टन्नै उभिएका थिए । बसविसौनीभित्र बस, माइक्रो र टेम्पो लैजान र सडक किनारमा रोक्न पनि बन्देज गर्दैथिए प्रहरीहरु । कोटेश्वर हुदै नयाँठिमीसम्म जाने क्रममा आफ्नो बाइकमा कसैलाई लिफ्ट दिउँ न त भनेर कोटेश्वरको बसविसौनी नजिक रोक्न खोज्दा ट्राफिकले सिट्ठी फुकिहाल्यो, रोक्ने होइन भन्दै ।

मलाई लाग्यो भारतका प्रधानमन्त्री नरेन्द्र मोदी अकस्मात फेरि काठमाण्डौ उत्रेर भक्तपुर जान लागेछन कि भनेर । तर होइन रहेछ । गणतन्त्र नेपालको पहिलो महिला राष्ट्रपति विद्या भण्डारी र अर्का सर्वाेच्च पदधारी केपी ओली सरकारको सवारी रहेछ ।

सार्वजनिक सडकमा यात्रुहरुलाई अत्यन्तै कष्ट दिने गरि सवारी चलाईकोले यसलाई श्री १० राष्ट्रपति र प्रधानमन्त्रीको सवारी भन्दा फरक नपर्ला । किनकी, त्यो दिन सवारीको लागि गरिएको सुरक्षा व्यवस्था, २०६३ साल अगाडि श्री ५ को सवारीको भन्दा दोब्बर देखिन्थ्यो । नयाँ मौसूफहरु (राष्ट्रपति र प्रधानमन्त्री) को स्वागतका लागि सडक किनारमा सयौं सर्वसाधारणको उपस्थिति देखाउन शायद एमालेले त्यस्तो रणनीति अपनाएको थियो या मौसूफहरुको सुरक्षामा आँच आउने देखेर सुरक्षा निकायले त्यतिधेरै सुरक्षा दिएको थियो । दुईजना भिआईपिलाई हेलिकोप्टरबाट सिधै धुलिखेलमा उतार्ने सुझाव कसैले दिने आँट गरेनन या चाहेनन । यसमा पनि कसैको स्वार्थ थियो शायद ।

काठमाण्डौ विश्वविद्यालय धुलिखेलको रजत महोत्सवलाई सम्वोधन गर्न नयाँ मौसूफहरु त्यहाँ गएका रहेछन् । आफुले काठमाण्डौदेखि धुलिखेलसम्म आउँदा सर्वसाधारणलाई दिएको दुःख पीडाको कुनै मतलव नगरी, काठमाण्डौ विश्वविद्यालयले मुलुकमा योग्य र असल नागरिक उत्पादन गर्न गरेको योगदानको चर्चा गरेछन् । वाह ! क्या गजव ? गणतान्त्रिक देशका प्रमुखहरुको चाला । सीमित व्यक्तिको स्वार्थका कारण हजारौं जनताले दुःख पाउनु नै गणतन्त्रको मूल उपलब्धि रहेछ । जनतासामू धक फुकाएर यीनीहरु कहिले हिँड्न सक्लान ? अनि नयाँ मौसूफहरुको सवारीमा जनताले दुख नपाउने दिन कहिले आउला ?