प्रचलित भाषा र व्याकरण दुरुस्तै अवस्थामा फर्काउन माग गर्दै सर्वोच्चमा रिट

२४ भदौ २०७३ ,काठमाडौं । प्रचलित भाषा र व्याकरण दुरुस्तै अवस्थामा फर्काई भाषासम्बन्धी आयोग गठन गरेर मात्र नयाँ वर्णविन्यास लागू गर्नुपर्ने माग गर्दै सर्वोच्च अदालतमा रिट दायर भएको छ ।

अधिवक्ता तथा सञ्चारकर्मी स्वागत नेपाल र पत्रकार टपेन्द्र कार्कीले ०६९ साल साउन २२ गते तत्कालीन शिक्षामन्त्री दीनानाथ शर्माले मन्त्रीस्तरीय बैठकबाट लागू गरेको परिमार्जित वर्णविन्यास खारेज गरिनुपर्ने रिटमा उल्लेख गरिएको छ ।

परम्परागत नेपाली वर्णविन्यासको अस्तित्व मेटिने गरी तयार पारिएको नयाँ निर्णय खारेजको माग गर्दै सर्वोच्च अदालतमा रिट दायर भएको हो ।

रिटमा भनिएको छ कक्षा १ देखि ५ सम्म एकथरी, ६ देखि ९ सम्म अर्कोथरी, १० मा अर्कै थरी, ११–१२ मा अर्कै थरी र उच्च शिक्षामा अझ अर्कै थरी नियमको अभ्यास गराउन खोजिएको छ । एउटै कक्षामा सरकारी प्रकाशन र निजी प्रकाशनका पुस्तकहरूमा एउटै शब्द दुई किसिमले लेखाउनु पर्ने बाध्य पनि सिर्जना भएको छ । शोधपत्र लेख्ने विद्यार्थीहरूलाई थरी–थरीका प्राध्यापकहरूले थरी–थरी शैलीमा लेख्न बाध्य पारेर दिनुसम्म पीडा दिइएको छ । उनीहरूको मर्मबोध गर्ने निकाय कुन हो ?

पाठ्यक्रम विकास केन्द्रको प्रस्तावमा शिक्षा मन्त्रालयले सदर गरेको सम्पादन तथा प्रकाशन शैली पुस्तिका बदर गर्न माग गरिएको छ ।

परिमार्जित पाठ्यक्रम लागू हुँदा अहिले विद्यालयहरूमा पठनपाठनमा समस्या भएको र समय समयमा वर्ण विन्यास र व्याकरणका परिवर्तित नियमका कारण कुनै एक जना अतिशिक्षित तथा नेपाली विषयकै धुरन्धर विद्वान् प्राध्यापकले समेत शुद्ध लेख्न नजानीकनै मर्नुपर्ने लज्जास्पद अवस्था सिर्जना गरिएकोपनि रिटमा उल्लेख गरिएको छ ।

नयाँ निर्णय अनुसार तयार पारिएको व्याकरण पुस्तिका, पाठ्यक्रम र उच्च माध्यमिक शिक्षा परिषद् र त्रिभुवन विश्वविद्यालयले तयार पार्न लागेको नयाँ पाठ्यक्रम लागू हुन नहुने पनि निवेदकद्वयले जोड दिएका छन् ।