कविता : म मिति होइन मोमेन्टहरु सम्झन्छु

कविता
म मिति होइन मोमेन्टहरु सम्झन्छु…

–  स्वागत नेपाल
म मिति होइन ‘मोमेन्ट’हरु सम्झन्छु,
तिमी ‘मोमेन्ट’ होइन मिति सम्झिन्छ्यौ,
यही त फरक छ हामी वीच ।

हामीले अवसर गुमायौँ
तिमी भनिरहन्छ्यौ,
यदि अवसरको ढोका कहिल्यै खुलेन भने
म त यसो गर्छु्,
बरु एउटा ढोका आफैँ बनाउँछु ।
त्यसैले, भाग्य अरुमा होइन,
आफैँ भाग्य बनाउन थाल्छु ।
अहिले भाग्यले मलाई सबैथोक बिर्साइदियो
तिमी हाम्रा हरेक मोडका मितिहरु सोधिरहन्छ्यौ
म मिति होइन मोमेन्टहरु सम्झन्छु,
तिमी मोमेन्ट होइन मिति सम्झिन्छ्यौ,
यही त फरक छ हामी वीच ।

तिमीले खेर फालेको भनेको मिति
‘मोमेन्ट’ बनेको छ ‘मेमोरी’मा
मेरो लागि खेर गइरहेको छैन,
काम आएको छ सम्झनामा
तिम्रो लागि खेर गएको मिति
र, खेर गएको म
दुवै चीरनिद्रामा पुगे पनि
फेरि म जहाँ पुग्छु
त्यहीँबाट अर्को विहान हुनेछ
किनकि म जहाँ जाँदा पनि
आफ्नै सूर्योदय बोकेर हिँड्छु ।
मैले जे भोग्न नमज्जा ठानेँ,
आज त्यही सम्झन मज्जा लागिरहेछ
किनकि तिमी मिति सम्झन्छ्यौ
म ‘मोमेन्ट’हरु सम्झन्छु ।