कविता : त्यो देउता भन्ने मसँग डराएर भागिरहेको छ…

कविता
त्यो देउता भन्ने मसँग डराएर भागिरहेको छ
– स्वागत नेपाल

म वर्षौँदेखि
त्यो देउता भन्नेलाई
खोज्दै हिँडेको छु
र, त्यो मसँग डराएर भागिरहेको छ
त्यसैले मेरो अघि कहिल्यै देखा पर्दैन ऊ

यदि मसँग
उसको भेट भयो भने
पहिला भयङ्कर झगडा हुनेवाला छ हामीबीच
केही हिसाबहरु छन्
उसँग असुल गर्नु पर्ने,
केही मुद्दाहरु छन्
तुरुन्तै छिन्नु पर्ने

मलाई लोभ देखाएर,
केही क्षण हातैमा थमाइदिएर
मेरो सर्वस्व पसिनाको पाती खाएर
फेरि आफँै हरेर लगेका
मेरा जीवनका निसंख्यौँ खुसीहरु
मैले ऊबाट खोसेर लिनु छ,
हो, उसले ‘चाराना’ दिएर ‘बाह्राना’ असुलेको छ ।

तिनै हिसाबहरु तिर्न नसकेर
त्यो मेरो अघि देखा पर्दैन
त्यो मसँग भागिरहेको छ
हो, त्यो देउता भन्नेलाई मैले भेटेँ भने
पहिला व्यापक झगडा हुने छ
अनि मात्र
हामीवीच अभिवावदन आदान प्रदान हुनेछ ।